АҞӘА, абҵара 11 - Sputnik. Урыстәыла ахада Владимир Путии Аԥсны ахада Аслан Бжьаниеи Шәача абҵара 12 рзы еиԥылараны иҟоуп ҳәа аанацҳауеит Кремль асаит.
"Иазыԥхьагәаҭоуп ҩ-ганктәи ахәаахәҭра-економикатә, акультура-гуманитартә усеицура аҭагылазаашьеи аԥеиԥшқәеи рылацәажәара, Урыстәылатәи Афедерациеи Аԥсны Аҳәынҭқарреи рыбжьара 2014 шықәса абҵара 24 рзы анапы зҵаҩыз аиҩызареи астратегиатә партниорреи рзы Аиқәшаҳаҭра анагӡашьеи адәныҟаполитикатә координациеи арегионалтә шәарҭадара аиқәыршәареи рызҵаарақәа рзааҭгылара", - аҳәоит адырраҭараҿы.
Жьҭаара 30 рзы Аслан Бжьаниа атәыла ахадас дҟалеижьҭеи хәынтәны Москва иаҭаара хыркәшан.
Аԥсны ахада имаҵураҭыԥ данахагыла аахыс Урыстәыла ахада инаԥхьарала Аиааира амшныҳәа иазкыз ауснагӡатәқәагьы дрылахәын.