АҞӘА, ԥхынҷкәын 21 – Sputnik, Асмаҭ Ҵәыџьԥҳа. Амҽыша ауха Цандрыԥшь астанциа маҷ "Цандрыпш-тяга" аҿы авариа ҟалеит ҳәа Sputnik иазааицҳаит Маҳадыртәи ГЕС адиректор Станислав Хышба.
"Абригада аус руеит, акабель ааргараны иҟоуп. Уажәазы аҳауатә цәаҳәа амҩангара иаҿуп",- иҳәеит Хышба.
Иара иажәақәа рыла афымцалашара ҟалароуп ԥхынҷкәын 21 ахәылбыҽха.
Абҵара 20 рзы аҳабла Цандрыԥшь афымцалашара аиуразы апроблема ҟалеит. Иԥжәеит звольт ҳараку акабель. Иароуп аҳабла зегьы фымцалашарала еиқәзыршәо. Аҳабла ауааԥсыра уахыки-ҽнаки лашарада иаанхеит.
Абҵара 21 рзы аҭыԥ аҿы аус руан аизхамҩа, "Амшынеиқәафымцамч" рҟазауаа. Дара иалдыршеит Аҟәантәи инаргаз акабель аҿакны алашара роуа аҟаҵара. Абҵара 28 рзгьы араҟа авариа ҟалеит. Усҟан лашарада иаанхеит 15 ҩнаҭеи, агрофермеи.