АҞӘА, ажьырныҳәа 3-Sputnik. Гагратәи аиқәырхаратә-аԥшааратә гәыԥ аусзуҩцәа Москва инхо аԥсшьаҩы Сергеи Краходкин дрыԥшааит, иара ақалақь ахь дааргеит. Абри атәы аанацҳауеит АҶА апресс-маҵзура.
Ажьырныҳәа 2 рзы Аԥсны АҶА аусзуҩцәа иара убас аԥшаарақәа мҩыԥыргон Очамчыра араион Тамшь ақыҭан. Ақыҭан анхаҩы Дараселиа дыӡит ҳәа адырра ҟарҵеит иҭынхацәа.
Аиқәырхаратә аоперациа иалахәын Очамчыреи Очамчыра араиони реиқәырхаратә-аԥшааратә гәыԥқәа, акинологцәа алақәа рыманы, иаадкыланы 20-ҩык аусуҩцәа.
Ахәылбыҽха адырра ҟарҵеит Тамшь анхаҩы Тҟәарчал дыԥшаан ҳәа.