АҞӘА, жәабран 3 - Sputnik, Бадраҟ Аҩӡба. Аԥсны Апарламент адипломатцәа рзы авизақәа раԥыхраз Шьамтәылеи Аԥсни рыбжьара аиқәшаҳаҭра аратификациа азыруит.
2021 шықәсазтәи раԥхьатәи Апарламент аилатәара аартуа Апарламент аиҳабы Валери Кәарҷиа иазгәеиҭеит ааԥынтәи асессиа аҳәаақәа ирҭагӡаны адепутатцәа ареспубликазы аҵакы зманы иҟоу апроектқәа жәпакы ирыхәаԥшраны ишыҟоу.
Абри ашьҭахь адепутатцәа амшхәаԥштә азҵаара шьақәдырӷәӷәеит. Адепутат Асҭамыр Логәуа адипломатиатәии амаҵзуратәи паспортқәа змоу рзы авизақәа рзаԥыхразы Аԥсни Шьамтәылеи рыбжьара Аиқәшаҳаҭра апроект даԥхьеит. Агәыӷра ааирԥшит ԥхьаҟазы атәылақәа рыҩба руааԥсыра зегьы рзы авизақәа мап рыцәкхап ҳәа.
Адепутат ааԥхьара ҟаиҵеит азакәан апроект иадгыларц. 26-ҩык апарламентарицәа азакәан апроект азы рыбжьы рҭиит еицҿакрыла. Аиқәшаҳаҭра азырхоуп Аԥсни Шьамтәылеи рыбжьара ишьақәгылоу ҩ-ганктәи аизыҟазаашьақәа рырӷәӷәара, хаҭала адипломатиатәии амаҵзуратәии паспортқәа змоу ауааԥсыра визада реиҭанеиааира .
Аԥсни Шьамтәылеи наҟ-ааҟ рхьыԥшымра шазхарҵои адипломатиатә еизыҟазаашьақәа шрыбжьарҵои азы аҳәамҭа ҟарҵеит 2018 шықәса лаҵара 25 рзы.
2020 ԥхынгәымза анҵәамҭазы Шьамтәылатәи Арабтә республика ахада Башар аль-Асад дидикылеит Аԥсны Аҳәынҭқарра азинмчра нагӡа змоу ацҳаражәҳәаҩ Баграт Хәытаба. Имҩаԥган аҳәынҭқарратә гәраргагатә шәҟәқәа реимдара. Дамаск ақалақь аҿы жьҭаара 6 рзы Шьамтәылатәи Арабтә республикаҟны Аԥсны Аҳәынҭқарра Ацҳаражәҳәарҭа официалла аартра ацеремониа мҩаԥысит.