АҞӘА, жәабран 8 – Sputnik, Бадри Есиава. Ақалақь иахьаҵанакуа иныҟәо аԥстәқәа араион акоммуналтә маҵзурақәа ақалақь иалганы иоурышьҭлоит уажәшьҭарнахыс ҳәа иҳәеит Гәдоуҭа араион акоммуналтә маҵзура аиҳабы Феликс Сымсым.
"Макьаназ аҭыԥ алкаам, аха арахә ақалақь аҵакыра иалаагалоит. Ари зегь зыҟаҳҵо арахә ақалақь инеиааиуа иахьалоу азоуп. Аиҳарак арахә зтәу Лыхны ақыҭа ауааԥсыра роуп", - ҳәа иҳәеит иара.
Сымсым иажәақәа рыла, ихуаадоу аԥстәқәа рыпроблема ыҟоижьҭеи акрааҵуеит. Анапхгара изныкымкәа рҽазыршәахьеит уи аус аӡбара ахараԥсатә санкциақәа, ма рҭакра ала, аха лҵшәа амоуит.
"Жәамшла арахә ҭакны уԥшызаргьы, уаҩ дашьҭаланы днеиуам. Иоуҳашьҭыр акәхоит знымзар зны", - ҳәа иҳәоит Сымсым.
Арахә ақалақь иалганы роушьҭра ахьынӡамҩаԥысуа атәы Феликс Сымсым аҭак аҟаҵара ицәыуадаҩуп аха иара иазгәеиҭеит арахә зтәу шракәу уи зхьырԥшу. Дасу ирахә иҩны ибалароуп ҳәа азгәеиҭоит иара.