АҞӘА, хәажәкыра 1 – Sputnik, Бадри Есиава. Пицундантәи ареспубликатә мҩаду ахь уназго амҩа аремонт иалгеит ҳәа Sputnik иазеиҭеиҳәеит Аԥсны Акапиталтә ргылара аусбарҭа атехникатә хылаԥшра амаҵзура анџьныр Дикран Хынҭәба.
"Жәабран 27 рзы инаӡеит ареспубликатә мҩаду аҟынӡа", - иҳәеит иара.
Уаанӡа Пицундатәи амҩа аремонт аанкылан иҟан аҳауатә ҭагылазаашьақәа инарыдҳәаланы ҳәа иҳәеит Sputnik акорреспондент аинтервиу иҭо Дикран Хынҭәба.
Пицундантәи ареспубликатә мҩаду аҟынӡа амҩа аремонт хыркәшоуп
© Видео Sputnik
Пицундантәи ареспубликатә мҩаду ахь уназго амҩа аремонт иалаган Аԥсны асоциал-економикатә ҿиараз Аинвестпрограмма аҳәаақәа ирҭагӡаны 2020 шықәса абҵарамзазы. Иазоужьын 80 миллион мааҭ.
Аусурақәа мҩаԥнагон "Амҩа-ргыларатә комбинат", ахылаԥшра ҟанаҵон Аԥсны Акапиталтә ргылара аусбарҭа.