АҞӘА, хәажәкыра 17- Sputnik. Очамчыра араион аҿы аԥсабаратә былрақәа рырцәара иаҿын хәажәкыра 16 зегьы. Аҵх акыр инеихьан зехьынџьара амца арцәара алдыршеит ҳәа аанацҳауеит Аԥсны АҶА апресс-маҵзура.
Амцакра ыҟан Очамчыра, Аҽгәара, Лашькьындар, Аӡҩыбжьа, Кындыӷ, Араду, Баслахә.
Амца дырцәон Очамчыра араион амцарцәара-еиқәырхаратә хәҭа зегьы, иара убасгьы аамҭак азы уи иалархәын Гал араион амцарцәара-еиқәырхаратә хәҭагьы.
Иҟаз аҭагылазаашьазы Лашькьындар ақыҭа амҩаду аҿы аныҟәара аанкылан. Амца ркын аевкалиптҵлақәа, аԥсаҵлақәа.
АҶА адыррала амца иахыҵхырҭоуп ақыҭауаа руҭрақәеи рҳәысҭақәеи рҿы арыцқьаратә усурақәа имҩаԥырго.