АҞӘА, мшаԥы 2 - Sputnik. Аҟәатәи ақалақьтә ӡбарҭа Станислав Культа, Андреи Локтионов, Аслан Гуатижев рырбаандаҩратә ҿҳәара аҽа мызкы ацнаҵеит, 2021 шықәса лаҵара 4 аҟынӡа. Абри атәы аанацҳауеит аӡбарҭа асаит.
Убри аан аус аҽа лахәылак – Талех Гасанов иганахь ала Апрокуратура хада азыҳәа иақәшаҳаҭымхеит.
Аӡбарҭа аверсиала Культа, Локтионов, Гуатижев, Ахра Аҩӡба, Талех Гасанов - еиқәшаҳаҭханы абџьари аџьаԥҳани азакәаншьаҭа рымамкәа иаархәеит, Аԥсны азакәан "Абџьар азы" еилаганы Аҩӡба дахьынхоз аҭыԥ аҿы иҵәахны ирыман.
Аԥсны ахада уаанӡатәи ицхырааҩ Ахра Аҩӡба даанкылан хәажәкыра 4 рзы. Азинхьчаратә усбарҭақәа русзуҩцәа хәажәкыра 4 рзы Ахра Аҩӡба дахьынхоз аҩнаҟны иаадырԥшит иҵәахыз абџьар, аџьаԥҳаны, ахархәага ҷыдақәа, арадиодырраҭара мҩаԥызго ашьақәгылақәа. Ашьаус хацыркын уаанӡа еиқәшаҳаҭханы абџьари аџьаԥҳани азакәаншьаҭа рымамкәа раахәара, рыҵәахра, рымҩангара, рныҟәгара ахьымҩаԥыргоз азы.
Хәажәкыра 7 рзы Аҟәатәи ақалақьтә ӡбарҭа Ахра Аҩӡбеи ихьчаҩцәа: Талех Гасанов, Аслана Гуатижев, Андреи Локтионов, Станислав Культа мызкы ҭакрала ирхыргарц аӡбамҭа аднакылеит.
Ахәаша, мшаԥы 2 рзы Аԥсны АШәМ ахыбраҿы имҩаԥысуеит Ахра Аҩӡба иганахь ала аусӡбара.