АҞӘА, мшаԥы 12 - Sputnik. Аԥсны акоронавирус азы иалагалаз аԥкрақәа рԥсыҽны даҽа мызкы рыҿҳәара иацҵоуп – лаҵара 12 рҟынӡа. Абри азы аусԥҟа инапы аҵаиҩит Аԥсны ахада Аслан Бжьаниа.
Аԥсахрақәа инарықәыршәаны СПА-салонқәеи амассажтә салонқәеи асаунақәеи русура азин ҟаҵоуп. Уи адагьы азин ҟаҵоуп иарку аҭыԥқәа рҿы арҵаратә кружокқәа, акәашаратәи арепетициатәи залқәа (асекциақәа), ахәыҷтәы хәмарратә центрқәа, акомпиутертә залқәа, абоулингқәа, егьырҭ агәмырҿыӷьратә усҳәарҭақәа русура.
Аԥсны ауааԥсыра акоронавирус рацәыхьчаразы Акоординациатә штаб мшаԥы 9 азтәи аилатәараҿы ахада иабжьнагеит алаҵаҟаҵара иалагаанӡа аԥкрақәа рыҿҳәара иацҵазарц.
Аепидемиа иаалагазар Аԥсны 13691 коронавирустә-хҭыс ашәҟәы иҭагалоуп, 217-ҩык рыԥсҭазаара иалҵхьеит.