АҞӘА, мшаԥы 12 - Sputnik. Аԥсны ахада Аслан Бжьаниеи акоронавирустә инфекциа зыхганы знапынҵақәа ирзыхынҳәыз Аԥсны аԥыза-министр Александр Анқәаби аусутә еилацәажәара мҩаԥыргеит.
Абри атәы аанацҳауеит ахада ипресс-маҵзура.
Ахадеи аԥыза-министри атәылаҿ иҟоу аҭагылазаашьеи ԥхьаҟатәи аусуратә планқәеи ирылацәажәеит.
Аԥсны аԥыза-министр Александр Анқәаб акоронавирустә инфекциа анихига ашьҭахь ареабилитациатә еиҭашьақәгылара дахысны мшаԥы 12 рзы инапынҵақәа дырзыхынҳәит.
Аԥсны аԥыза-министр Александр Анқәаб Урыстәыла ФМБА Афедералтә ҭҵаарадырра-клиникатә центр аҟынтәи данылырҩаа ашьҭахь Аԥсныҟа дхынҳәит, ауааԥсыра рахьгьы ааԥхьара ҟаиҵеит ахыхьчаратә ԥҟарақәа ирықәныҟәаларц, аҳақьымцәа ирҳәо иацныҟәаларц.