АҞӘА, мшаԥы 22 - Sputnik. Аԥсны ахада Аслан Бжьаниеи Урыстәыла аҳаиртә транспорт Афедералтә маҵзура анапхгаҩы Александр Нерадькои реиԥылара мҩаԥысит. Абри атәы аанацҳауеит ахада ипресс-маҵзура.
Аиԥылараҟны Аԥсни Урыстәылеи рыбжьара аҳаиртә еимадара аиҭашьақәыргылара иалацәажәан. Ҷыдала иазааҭгылан аҳаирбаӷәаза аинфраструктура аобиектқәа рреконструкциаз апроекттә усурақәа рызҵаара.
Иахьазы иаԥҵоуп Урыстәылеи Аԥсни рҟазауаа злахәу аусутә гәыԥ, аобиект аздырхиоит апроекттә усурақәа рымҩаԥгара, иаздырхиоит аусуразы ихымԥадатәиу амыругақәа рексперттә хәшьара. Уи адагьы азырхиара иаҿуп Аԥсны аҳаиртә закәанԥҵара аусхк аҟны ихымԥадатәиу адокументқәа.
Аганқәа ишьақәдырӷәӷәеит аграждантә авиациа аусхк аҟны еицыфеидоу аусеицура арӷәӷәареи арҿиареи шырҭаху.
Уаанӡа Аԥсны ахада аҳәамҭа ҟаиҵахьан Аҟәатәи аҳаирбаӷәаза 2024 шықәса иахымгакәа ишаартхо азы.
Иара убас шәаԥхьар ҟалоит:
- Ешба Аҟәатәи аҳаиртә баӷәазазы: азҵаара ган рацәала аҭҵаара иаҿуп