АҞӘА, лаҵара 5 – Sputnik. Афотоцәыргақәҵа "Аиааира ахаҿқәа. Ҳгәалашәареи ҳгәадуреи" аатит Амилаҭтә библиотекаҿы лаҵара 5 азы.
Ацәыргақәҵа аартраҿы дықәгыло Аԥсны иҟоу Урыстәыла Ацҳаражәҳәарҭа ахаҭарнак Олег Павлов иазгәеиҭеит Аиааира амш афырхаҵара, апатриотизмра, агәыӷра ишрымшу. Ацәыргақәҵа аартра иалахәыз аветеранцәа иҭабуп ҳәа реиҳәеит иахьатәи амш азы.
"Афотокадрқәа рыла улаԥш иҵыҵуеит Аџьынџьтәылатә еибашьра ду. Усҟантәи аамҭазтәи арратә фотохроника иаанарԥшуеит ирну ауаа рхаҿқәа ирныԥшуа агәыӷреи агәырӷьара азыԥшреи", - иҳәоит иара.
Ацәыргақәҵахь инагоуп 60 фотосахьа.
Павлов иҳәеит ари аҩыза ацәыргақәҵа ҵыԥхгьы имҩаԥыргараны ишазыԥхьагәаҭаз, аха апандемиа иахырҟьаны ишзалымшаз.
Ауснагӡатә еиҿыркааит Аԥсны иҟоу аурыс еицџьынџьуаа реиҿкаарақәа Ркоординациатә еидгыла, Аԥсны иҟоу Россотрудничество Ахаҭарнакра, Аԥсны иҟоу Урыстәыла Ацҳаражәҳәарҭа, Москватәи акультура-усутә центр "Москва Аҩны" рыдгыларала.