АҞӘА, лаҵара 6 - Sputnik. Аԥсны иҟоу Урыстәыла Аладатәи арратә округ аррамаҵзурауааи арратә оркестри 98 шықәса зхыҵуа Аџьынџьтәылатә еибашьра аветеран Артиуха Филипп Иван-иԥа Аиааира Амш 76 шықәса ахыҵра идырныҳәалеит. Абри атәы аанацҳауеит аокруг апресс-маҵзура.
Аррамаҵзурауаа сасны иҭааит Аибашьра Ду аветеран. Ҷыдала иԥенџьырқәа рыҵаҟа ихьӡ ала еиҿыркааит аконцерт.
Арратә оркестр амузыкантцәа аветеран изы иадырҳәеит амузыкатә композициақәа, арратә ашәақәа "Аиааира амш", "Катиуша" уҳәа егьырҭгьы.
Абаза акомандаҟаҵара ахьӡала аветеран ианашьан аҳамҭақәа.
Филипп Иван-иԥа исасцәа ирзеиҭеиҳәеит аибашьреи аибашьрашьҭахьтәи аамҭақәеи ирыҵаз ауадаҩрақәа, игәалаиршәеит аибашьра ахҭысқәа.
Филипп Артиух 17 шықәса ихыҵуан еибашьра ҳәа амҩа данықәлоз. 1942 шықәсазы дырхәит. Агоспиталь ашьҭахь Аԥсны аҭынч ԥсҭазаара амаҵ азура далагеит. Ара диԥшааит инасыԥ - Лиубовь.