АҞӘА, мшаԥы 8 – Sputnik. Иналукааша аԥсуа ҵарауаҩ, аполитикатә усзуҩ Иури Воронов имш иира аҽны анышә дахьамадоу ашәҭшьыҵәрақәа шьҭарҵеит Аԥсны анапхгара, аҵарауаа, ауаажәларратә еилазаара рхаҭарнакцәа, имҩаԥган агәаларшәаратә митинг.
Иури Воронов анышә дамадоуп Аԥснытәи аҳәынҭқарратә музеи ааигәара. Иахьа уаҟа еиҿкаан Воронов ирҿиаратә мҩа аазырԥшуаз афотоцәыргақәҵа.
Иури Воронов ибаҟа амҵан ашәҭқәа шьҭарҵеит иара убас Ахада ихаҭыԥуаҩ Бадра Гунба, Аԥсны Апарламент аиҳабы Валери Кәарҷиа, Аԥсны Ашәарҭадаратә хеилак амаӡаныҟәгаҩ Сергеи Шамба, Аԥсны Аҭҵаарадыррақәа ракадемиа ахада Зураб Џьапуа, Аԥсны иҟоу Урыстәыла ацҳаражәҳәаҩ Алексеи Двинианин, аҵарауаа, астудентцәа, ашколхәыҷқәа.
Археолог, кавказҭҵааҩ Иури Воронов диит лаҵарамза 8 1941 шықәса рзы Ҵабал, Вороноваа ргәараҭа "Иасочка" аҟны.
1991 иара депутатс далхын Аԥсны Иреиҳаӡоу Асовет ахь. Хәажәкырамза 1992 шықәса инаркны ԥхынҷкәын 1993 шықәсанӡа иара Аԥсны Иреиҳаӡоу Асовет аҿы ауаҩы изинқәеи жәларбжьартәи аизыҟазаашьақәеи рзы акомиссиа деиҳабын. 1993 шықәса рзы Аԥсны Аминистрцәа Рсовет ахада ихаҭыԥуаҩыс далхын, 1995 аԥыза-министр ихаҭыԥуаҩыс.
Иури Воронов дравторуп – 800 инареиҳаны аҭҵаарадырратәи апублицистикатәи статиақәа, уахь иаҵанакуеит 30 монографиа. Иҟоуп макьана икьыԥхьым аҵарауаҩ иусумҭақәагьы.
1995 шықәса, цәыббра 11 рзы Иури Николаи-иԥа Воронов итаацәеи иареи ахьынхоз Аҟәатәи иҩны аҿаԥхьа дшьын. Ацәгьоура назыгӡази, уи азы адҵа ҟазҵази зусҭцәоу иахьа уажәраанӡагьы ишьақәыргылам. Анышә дамардеит Аԥснытәи аҳәынҭқарратә музеи ааигәара. Аҳҭнықалақь амҩадуқәа руаки ахԥатәи абжьаратә школи ихьӡ рхыуп.