АҞӘА, лаҵара 13 - Sputnik. Аслан Бжьани аусдҵа ҭижьит Аԥсны ахада икадыртә резерв аиҿкааразы. Абри атәы аанацҳауеит ахада исаит.
Акадыртә резерв аԥҵахоит ареспублика ауааԥсыра аҳәынҭқарратә маҵзурахьы рнеираз еиҟароу азинқәа рымазааразы, ахада Иусбарҭаҿы, Аминистрцәа реилазаараҿы, аҳәынҭнапхгараҭара аусбарҭақәа рҿы ианаамҭоу зыҩаӡара ҳараку акадыртә еилазаарала аԥсахрақәа рыҟаҵаразы.
Арезерв иалагалахоит:
- 35 шықәса рҟынӡа зхыҵуа, апроектқәа рынагӡаразы аԥышәа зоухьоу ахада Иусбарҭаҿы, Аминистрцәа реилазаараҿы, аҳәынҭнапхгараҭара аусбарҭақәа рҟны аус зуа аҳәынҭмаҵзурауаа
- Анапхгаҩцәа қәыԥшцәа реиндаҭлара "Аԥсны агәадура" афиналистцәа.
Акадыртә резерв аиҿкаараз аусурақәа ркоординациа инапы ианҵоуп ахада Иусбарҭа анапхгаҩ ихаҭыԥуаҩ Зураб Қаџьаиа.