АҞӘА, лаҵара 27 – Sputnik, Селма Базԥҳа. Гагра араионтә еизара адепутатцәа араион ахадас Иури Хагәышь дшьақәдырӷәӷәеит. Абри атәы Sputnik иазеиҭеиҳәеит Гагра араионтә еизара ахантәаҩы Асҭан Агрба.
Агрба иажәақәа рыла аилатәара иалахәын 24-ҩык адепутатцәа рҟынтәи 22-ы. Иури Хагәышь Гагра араион ахадас иҟаларазы адепутатцәа зегьы еицҿакны икандидатура адгылара арҭеит.
Иури Хагәышь диит 1985 шықәсазы, Гагра. 2007 шықәсазы далгеит Ростовтәи аинститут, аиуристтә факультет. 2007 шықәса инаркны 2017-нӡа анаплакҩыс дыҟан.
2017 шықәсазы Аԥсны Жәлар Реизара адепутатс далхын.
Иури Хагәышь Гагра араион ахада инапынҵақәа наигӡон мшаԥымза 30, 2020 шықәса раахыс.