АҞӘА, ԥхынгәы 1 - Sputnik, Бадраҟ Аҩӡба. Аԥсны Апарламент аӡбарҭақәа рцифратә система аиҭарҿыцра аҿҳәара ахәҭак инахеит 2022 шықәса ажьырныҳәамза 1 аҟынӡа.
Апарламент ақәҵара инақәыршәаны ажьырныҳәа 1 2022 шықәса нахыс АСИС алагалахоит азеиԥш иурисдикциа иаҵанакуа аӡбарҭақәа рҿы аӡбарҭатә еилатәарақәа рҟны абжьии асахьаҭаҩратәи атехника ахархәарада.
2022 шықәса ԥхынгәы 1 инаркны аусура иаларгахоит:
- Аԥсны Арбитражтәи Аконституциатәи ӡбарҭақәа рҿы аӡбарҭа-информациатә система;
- азеиԥш иурисдикциа иаҵанакуа аӡбарҭақәа рҿы аӡбарҭатә еилатәарақәа рҟны абжьии асахьаҭаҩратәи атехника ахархәара.
2012 шықәсазы ихацыркыз аӡбарҭатә система аиҭакрақәа раан еиҳа ихадароу акәны аус адулара иалагеит аӡбарҭақәа рҿы аӡбарҭа-аинформациатә система. Аха иара алагалара акырынтә иахыргахьан.