АҞӘА, ԥхынгәы 26 - Sputnik, Асмаҭ Ҵәыџьԥҳа. Аԥсны Апарламент адепутатцәа атәыла ахада иабжьыргеит COVID-19 аламырҵәаразы аԥкырацҵақәа алеигаларц. Абри азы асессиа аилатәараҿы адепутатцәа ақәҵара рыдыркылеит .
Апарламент ақәҵара иазԥхьагәанаҭоит:
- Аԥсны аҵакыра иахьаҵанакуа асабрадақәа рхаҵара ахылаԥшра аҭара;
- Ауаажәларратә транспорт аныҟәара аанкылара ахыхьчаратә хархәагақәеи асоциалтә дистанциеи ианрықәымныҟәо, иара убасгьы ауаажәларратә транспорт есҽны арзҩыдара амҩаԥгара;
- Аԥсны иахьаҵанакуа ачаратә, акультуратә, абаҩырҵәыратә, аспорттә, агәмырҿыӷьгатә, ацәыргақәҵатә уҳәа амассатә уснагӡатәқәа иарку реиԥш иаарту аҭыԥқәа рҿы амҩаԥгара азин аҟамҵара;
- Акоронавирустә инфекциа ҿыц аҟынтә ахәышәтәра иалахәу амедусзуҩцәа рулафахәи ршәарацҵеи ианаамҭо рыҭара ахылаԥшра азура;
- Акоронавирустә инфекциа адиагностиказы алабораториақәа рылшарақәа реиҿкаара;
- Ахәаахәҭра, амаҵзура, асасдкылара (асасааирҭақәа, аԥсшьарҭаҩнқәа) аобиектқәа русура асанитар-епидемиологиатә ҭагылазаашьа ахылаԥшра, атуристцәа раангыларҭа ҭыԥ ахь инеиуа ршоурашәара амҩаԥгара;
- Аԥсны Агәабзиарахьчара аминистрреи АИХқәеи ауааԥсыра аинформациа рыҭара (асоциалтә ӡыргара) Covid-19 аламырҵәашьазы, иара убасгьы ачымазара раԥхьатәи аҟазшьақәа рцәырҵраан ахымҩаԥгашьазы;
- Агәабзиарахьчара аминистрра аепидмаҵзуреи аганахь ала ахылаԥшра рыӷәӷәазарц ауаажәларратә ҭыԥқәа-ақьафурҭақәеи, акаҳуажәырҭақәа, акрыфарҭақәа уҳәа егьырҭ ахыбрақәа, аепидемиологиатә уснагӡатә ҿыцқәа шынарыгӡо азы.
- Аԥсны акоронавирус ахәышәтәраз зыда ԥсыхәа ыҟам ахәшәқәеи алаҵеи раахәара мҩаԥгазарц;
- Ашколқәранӡатәи аусҳәарҭақәа русура аанкылазарц;
- Аҳәынҭқарратә напхгараҭара, аҳәынҭқарратә усбарҭақәа, аиҿкаарақәа рнапхгаҩцәа рнапы ианҵазарц 60 шықәса ирҭысхьоу аусуҩцәеи, ашколқәраҟынӡа иҟоу ахәыҷқәа змоуи рмаҵзурақәа рҟынтә рулафахәы еиқәырханы рхы иақәиҭтәызарц;
- Иҳәынҭқарратәым аиҿкаарақәа рнапхгаҩцәа рнапы ианҵазарц 60 шықәса ирҭысхьоу аусуҩцәеи ашколқәраҟынӡа иҟоу ахәыҷқәа змоуи рмаҵзурақәа рҟынтә рулафахәы еиқәырханы рхы иақәиҭтәызарц;
- Акультуратә усҳәарҭақәа (атеатрқәа, амузеиқәа, абиблиотекақәа, акультуратә центрқәа, акультура аханқәа, аконцерттәии ацәыргақәҵатәи залқәа) русура аанкылазарц.
Адокумент иазыԥхьагәанаҭоит аԥыза-министр акоронавирус аламырҵәаразы Акоординациатә штаб аусуразы аинформациа мҩаԥигаларц.
Адепутат Валери Агрба игәаанагара иҳәеит аҽа пунктк алагалазарц – Аԥсни Урыстәылеи рҳәаа иахысуа ршоурашәара мҩаԥыргаларц, атәыла иалало ПЦР-тестқәа рымазаара гәаҭалазарц. Депутатцәақәак ари иақәшаҳаҭхеит.
Адепутат Лаша Ашәба иҳәеит адокумент аԥхьанатәтә атекст аԥсахрақәа алагалахар, Урыстәыла атәылауаа рзы ПЦР-тестқәа хымԥадатәны иҟарҵар, Урыстәылагь уи аҭакс ҳтәылауаа аҳәаа ианахысуа атестқәа рымазаара аҭахны иашьар шауа.
Абри апункт азы абжьыҭараан иара иахәҭаз абжьы амоуит.
Ԥхынгәы 5 аахыс Аԥсны азин ыҟам иарку ахыбрақәа рыҩныҵҟа ачарақәа, агәырӷьаратәи аныҳәатәи уснагӡатәқәа, аԥсхәрақәа рымҩаԥгара. Ԥхынгәы 12 аахыс акультуратә усҳәарҭақәа аус руам.