АҞӘА, нанҳәа 2- Sputnik. Урыстәылатәи аҳәаахьчаҩцәа Аԥсныҟа закәаншьаҭада атравматикатә тапанча апатронақәа ралагалара аԥдырҟәҟәааит ҳәа аанацҳауеит Урыстәыла АШәМ Краснодартәи атәылаҿацә аҳәаахьчаратә Усбарҭа апресс-маҵзура.
Иазгәаҭоуп апатронақәа амашьынаҿ акәалаԥқәа ирҭаҵаны ишыҵәахыз. Иаарԥшу аџьаԥҳаны аҳазалхыҩцәа ирыҭоуп апроцессуалтә ӡбара адкылараз.
"Абџьар азы" Афедералтә закәан ахәҭаҷ 17 инақәыршәаны абџьари апатронақәеи Урыстәыла аҵакырахь алагалареи алгареи рзин ыҟоуп Росгвардиа ар Рфедералтә маҵзура азин ала.