Аԥсны аџьаусшәҟәқәа рыбланкқәеи рыгәлаҵақәеи рыхәԥса шьақәдырӷәӷәеит

"Аџьаусшәҟәқәа рыбланкқәеи рыгәлаҵақәеи рыҭира аԥҟараз" ақәҵара апроект рыдыркылеит нанҳәа 5 азы Аминистрцәа реилазаараҿ.
Sputnik
АҞӘА, нанҳәа 5 – Sputnik, Бадри Есиава. Аџьаусшәҟәқәа 260 мааҭ иаԥсахоит, агәлаҵақәа – 100 мааҭк. Абри аӡбра шьақәнарӷәӷәеит Аминистрцәа реилазаара.
Аԥсны ахархәарахь ицәыргахоит аџьаусшәҟә ҿыцқәа
"Ԥхынгәы 21 азы Аминистрцәа реилазаара Афинансқәа рминистрра адҵа анаҭеит аџьаусшәҟә ҿыцқәа рыбланкқәеи рыгәлаҵақәеи рформа шьақәнарӷәӷәарц, ахархәараз ауснагӡатәқәа мҩаԥнагарц. Аџьаусшәҟәқәа 260 мааҭ иаԥсахоит, агәлаҵақәа – 100 мааҭк", - иҳәеит аԥыза-министр ихаҭыԥуаҩ, афинансқәа рминистр Владимир Делба.
Иара иҳәеит аџьаусшәҟәы мыӡзар знык ада аахәара аҭахым. Аџьаусшәҟәқәа зегьы АУН "Абхазуниверсалторг" иаҭахоит Аԥсны аҵакыраҿы аҭиразы.
Ашәҟәқәа рыҭира афеида Ареспубликатә биуџьет иахыԥхьаӡалахоит ҳәа иҳәеит Делба.