АҞӘА, нанҳәа 5 - Sputnik, Сариа Кәарцхьиаԥҳа. Аԥснытәи абитуриентцәа, Урыстәыла аҵакыраҿы аамҭала, ма наунагӡатә ҭаҩра змоу азин роуам квотала урыстәылатәи аҵараиурҭақәа рҭалара. Абри атәы Sputnik иазеиҭарҳәеит Аԥсны иҟоу Россотрудничество ахаҭарнакраҿы.
Абитуриентцәа, Россотрудничество аҟынтә квотала аҵараиурҭа аҭалара зыгәҭаку ари азҵаара рыӡбароуп цәыббра 1 аҟынӡа.
"Урыстәыла аҵареи аҭҵаарадырреи рминистрра аҭахрақәа инарықәыршәаны Урыстәыла Аиҳабыра ишьақәдыргыло аквота ала иреиҳаӡоу аҵараиурҭақәа рҭалара азыԥхьагәаҭам Урыстәыла аҵакыраҿы аамҭала, ма науынагӡа ҳәа аҭаҩра змоу абитуриентцәа рзы", - рҳәеит ахаҭарнакраҿы.
2021 шықәса цәыббра 1 инаркны апортал education-in-russia аатуеит аҽҭаҩразы.
Аквотақәа 2022 шықәсазы заҟа ҟалоуи иарбан хырхарҭақәоуи макьаназ еилкаам.
2021 шықәсазы Аԥсны иазоужьын 52 квота. Аквотақәа рҳәаа иҭагӡаны иазыԥхьагәаҭоуп аспирантура, амагистратура, абакалавриат рҿы аҵараҵара.