АҞӘА, нанҳәа 18 - Sputnik. Амшын еиқәа афлот арадиациатәи, ахимиатәи, абиологиатәи хьчара архәҭаҟынтәи Аԥсны акоронавирус аламырҵәаразы ҩаԥхьа инеит ҳәа аанацҳауеит Амшынеиқәатә флот аинформациатә еиқәыршәара аҟәша.
Амшын еиқәа афлот арадиациатәи, ахимиатәи, абиологиатәи хьчара архәҭа арахь амҩа иқәлеит Урыстәыла атәылахьчара амобилтә госпиталь автоколонна иацны.
10 автомашьынаки 30-ҩык аҟазауааи, астанциақәа АРС-14М, арԥхага машьынақәа ТМС-65У, автономтә хархәагақәа, адезактивациеи адезинфекциеи ртехника ДКВ-1К рыла еиҿкаау Амшынеиқәа афлот арадиациатәи, ахимиатәи, абиологиатәи хьчара архәҭа реишьҭагыла Ҟрымтәи адгьылбжьахаҟынтәи Аԥсныҟа иаауеит.
Хара имгакәа ари арҟәша атехника арзҩыдаразы автопарки апунктқәеи аамҭала аусура иаланаргоит. Анаҩс Аладатәи Арратә округ аррамаҵзурауааи Аԥсны аҟазауааи рыцырхырааны асоциалтә обиектқәа аус рыдырулалоит.
Дара арахь амҩа иқәҵоуп Урыстәыла атәылахьчара аминистр Сергеи Шоигу иӡбарала атәыла анапхгара иҟарҵаз аҳәара ашьҭахь. Иара убасгьы арахь иаашьҭуп хырхарҭарацәалатәи амобилтә госпиталь.
Уаанӡа, 2020 шықәса мшаԥымзеи жьҭаарамзеи рзы Амшын еиқәа афлот арадиациатәи, ахимиатәи, абиологиатәи хьчара архәҭаҟынтәи Аԥсны акоронавирус аламырҵәаразы ацхыраара ҟанаҵахьан.