АҞӘА, нанҳәа 24 - Sputnik. Аԥсны АҶА зышәагаа маҷу аӷбақәа рзы аҳәынҭқарратә инспекциа аусзуҩцәа Риҵа аӡиаҿы ахаԥышәалатә плиаж ыҟоу иҟаму гәарҭеит ҳәа аанацҳауеит аусбарҭа асаит.
Уаанӡатәи адыррақәа рыла, Сталин идача аганахьала аӡиа Риҵаҿы ахаԥышәалатә плиаж еиҿыркааит ҳәа иҟаз аинформациа иашамхеит.
Уи адагьы Риҵатәи амилаҭтә парк аҵакыраҿы иқәыргылоуп аӡиаҿы аҽыкәабара азин шыҟам азгәазҭо адҩыларақәа.
Аинспекциа аусзуҩцәа акатамаранқәа рыла аӡиа иху атуристцәа аиқәырхага жилетқәа рымоу ирымаму гәарҭеит.
Акатамаранқәа зтәу ирҳәеит урҭ рҟынтә џьоукы-џьоукы ашәарҭадаратә ԥҟарақәа ирықәымныҟәакәа ажилетқәа шыршәырхуа.
Аиқәырхаҩцәа абжьгара ҟарҵоит аԥҟарақәа еиларымгаларц.
Риҵа аӡиаҿы аҽыкәабара зынӡагьы иҟалаӡом. Иара аҵа макьана инагӡаны иҭҵаам, аӡы хьшәашәоуп, уи адагьы иалало аӡиас Лашԥсы иахҟьаны аӡаҵаҟатә ӡеикәшара ӷәӷәаны иамоуп.