АҞӘА, нанҳәа 25 - Sputnik. Аахыҵ Кавказтәи ареспубликақәа руак атәылауаҩ аурыс-аԥсуа ҳәаа анаркотикатә маҭәашьарқәа рахыгаразы иус рыӡбит. Абри атәы аанацҳауеит Урыстәыла АШәМ Краснодартәи атәылаҿацә аҿы Аҳәаахьчаратә усбарҭа апресс-маҵзура.
Шәача ақалақь Адлертәи араионтә ӡбарҭа азеиԥш режимтә колониаҿы хәышықәсеи ҩымзи ҭакрыла ихигаразы азыӡба аднакылеит.
Азинеилагаҩ Урыстәылантәи Аԥсныҟа аиасра иҽазишәон аушьҭырҭатә ҭыԥ "Адлер" аҿы данныркылаз. Иагьидырбалеит ахх-шкәакәа злаԥсаз аилаҳәара.
Краснодартәи атәылаҿацә ААР Шәача ақалақь ААР аексперт-криминалисттә ҟәша ишьақәнаргылеит аилаҳәара илаз 0,81 грамм иҟаз ахх анаркотикатә маҭәашьар мефедрон шакәыз.
Азыӡба азинмчра аиуит.