АҞӘА, нанҳәа 25– Sputnik, Бадраҟ Аҩӡба. Аԥсны ашьапылампылтә федерациа аӡбаҩцәа разыҟаҵарҭатә центр аартра агәҭакуп ҳәа иҳәеит Sputnik аинтервиу аҭо Афедерациа ахада Ҭарашь Ҳагба.
"Ҳара ашьапылампыл иасуа тәылоуп, аха ҳхатәы арбитрцәа ҳамам. Ари проблемоуп. Уи азы иаҳҭахуп азҵаара ҳаӡбарц. Сара аҟаза ӡбаҩ сиацәажәеит. Дмитри Жуков акыршықәса аӡбаҩцәа разыҟаҵарҭа Ацентр адиректорс дыҟоуп. Ахәмаррақәа рҟны аӡбара зҭаху ауаа ҳаԥшаар хәыдаԥсада рҟазара иацаҳҵоит", - иҳәеит иара.
Аҭыԥантәи аӡбаҩцәа ахәыҷтәы хәмаррақәа раан иазыҟаҵахоит, нас урҭ ахраҿатә хәмаррақәагьы рыӡбо иалагоит.
"Азыҟаҵаратә процесс ҩба-хԥа шықәса ҳагоит. Ақәратә ԥкыра ыҟам. Ҳәарада, аҿар ҳадҵаалар ҳҭахуп", - иҳәеит Афедерациа ахада.
Аӡбаҩцәа разыҟаҵарҭа ацентр напхгара азҭараны иҟоу аҟаза Дмитри Жуков Аԥсныҟа даауеит нанҳәа анҵәамҭазы. Дмитри Жуков ConIFA, урыстәылатәи аиндаҭлара аҩбатәи алига, Аԥсны ачемпионат ахәмаррақәа рҟны ӡбаҩыс дыҟан.
Аӡбаҩцәа разыҟаҵара акурсқәа рахь зыҽҭазҩырц зҭаху аҭел иасыр ҟалоит WhatsApp +7 918 155-21-50.