АҞӘА, цәыббра 2 - Sputnik. Аԥсны агәабзиарахьчара аминистр Едуард Быҭәба амобилтә госпиталь даҭааит ҳәа аанацҳауеит аусбарҭа апресс-маҵзура.
Атәылахьчара аминистр ихаҭыԥуаҩ Нодар Аҩӡбеи, агоспиталь аиҳабы Абдулмеџьиҭ Магомедови иареи аусутә зҵаарақәа акыр ирылацәажәеит.
"Еиԥҟьара ҳәа акгьы ыҟам. Апациентцәа ианаамҭоу иахәҭоу амедицинатә цхыраара роуеит. Афатә-ажәтә азы проблема ыҟам, аӡы шҳамац иҳамоуп", - иҳәеит Магомедов.
Иара иазгәеиҭеит аҭагылазаашьа шыуадаҩу, аха ахылаԥшра ауҭартә ишыҟоу. Цәыббра 1 азтәи адыррала, агоспиталь 78 пациент ҭоуп, жәаҩык рҭагылазаашьа уадаҩуп. Есыҽны бжьаратәла 10-ҩык рыдыркылоит.
"Ачымазцәа реиҳараҩык рҭагылазаашьа бжьаратәуп. Астационартә хәышәтәра иахысхьеит 48 пациент", - иҳәеит Магомедов.
Едурад Быҭәба иҳәеит аусбарҭеи агоспитальи шеиныруа аиҿкааратә зҵаарақәа рганахьала.
Аминистр "азона ҟаԥшь" даҭаан апациентцәа ргәабзиара дазҵааит. Амобилтә госпиталь аколлектив ҭабуп ҳәа реиҳәеит COVID-19 змоу ауаа рыхәышәтәразы иҟарҵо азы.