АҞӘА, цәыббра 16 – Sputnik, Бадраҟ Аҩӡба. Аҵараиуратә усҳәарҭақәа рҟны ачымазара маҷуп ҳәа иҳәеит Sputnik аинтервиу азҭаз Аҵареи абызшәатә политикеи рминистрра апресс-маӡаныҟәгаҩ Аслан Қәҭелиа.
"Иуҳәар ҟалоит аҵараиурҭақәа рҿы ачымазара лаҟәуп ҳәа. Аминистрра анапхгареи аусзуҩцәеи ашколқәа ирҭааны акарантинтә уснагӡатәқәа рымҩаԥгашьа иахәаԥшуеит. Арзҩыдагақәа аҭахны иҟазар, аминистрра ацхыраара ҟанаҵоит", - ҳәа иҳәеит иара.
Қәҭелиа далацәажәеит арҵаҩцәеи аҵаҩцәеи рыбжьара COVID-19 заҟаҩы ирымоу.
Қәҭелиа далацәажәеит арҵаҩцәеи аҵаҩцәеи рыбжьара COVID-19 заҟаҩы ирымоу.
"Гагра араион аҿы жәеизаҩык аҵаҩцәеи ҩыџьа арҵаҩцәеи акоронавирустә инфекциа рымоуп, ирхыргахьеит 140-ҩык. Гәдоуҭа араион аҿы: 13-ҩык арҵаҩцәеи 30-ҩык аҵаҩцәеи. Иаркуп аклассқәа хәба, 25-ҩык арҵаҩцәа алаҵа рзыҟарҵахьеит", - иҳәеит иара.
Аҟәа араион аҿы рҵаҩык дычмазаҩуп, 14-ҩык алаҵа ҟарҵахьеит, иара убри аҟара COVID-19 рхыргахьеит.
"Аҟәа иахьазы 36-ҩык аҵаҩцәеи ааҩык арҵаҩцәеи чмазцәоуп, 378-ҩык рхы ԥхьакны иҟоуп, алаҵаҟаҵара иахысхьеит 80-ҩык. Зынӡа 290-ҩык арҵаҩцәа ачымазара рхыргахьеит. Ақалақь аҿы аклассқәа 10 аркуп", - ҳәа иҳәеит Қәҭелиа.
Гал араион аҿы 82-ҩык арҵаҩцәа алаҵа ҟарҵахьеит, 22-ҩык ачымазара рхыргеит. Уажәазы быжьҩык арҵаҩцәа чмазцәоуп, ааҩык аҵаҩцәа чмазцәоуп, класск аркуп.
Тҟәарчал араион аҿы ичмазаҩуп 47-ҩык аҵаҩцәа, 13-ҩык арҵаҩцәеи. Алаҵа ҟарҵахьеит 62-ҩык арҵаҩцәа.
Гәылрыԥшь араион аҿы ичмазаҩуп хҩык арҵаҩцәа. Аҵаҩцәа рахьынтә чмазаҩ дыҟам.
Очамчыра араион аҿы ичмазаҩуп фҩык арҵаҩцәа, ԥшьҩык аҵаҩцәеи. Иаркуп аклассқәа фба.