АҞӘА, цәыббра 16 - Sputnik. Авольтҳарак ҳауатә цәаҳәа "Ԥсоу" аҿы еиҭашьақәдыргылахьеит икаҳаз ашьаҟақәа хәба рҟынтәи хԥа, аԥшьбатәии ахәбатәии ашьаҟақәа рмонтаж иаҿуп ҳәа аанацҳауеит "Амшынеиқәафымцамч" апресс-маҵзура.
Нанҳәа 20 рзы атәыла Аԥсны ахада Аслан Бжьаниа аилацәажәара мҩаԥигеит Аминистрра реилазаара алахәылацәеи анаплакы анапхгаҩцәеи алархәны.
Ԥхынгәы 29 рзы ааха роуит амагистралтә ҳауатә цәаҳәақәа "Ԥсоу". Аенергетикцәа ишырҳәо ала, дара рыда Урыстәылантәи Аԥсныҟа алашара аашьҭра залыршахом.
Аилацәажәараҿы иазгәаҭан астратегиатә цәаҳәа "Аҽгәара" аремонт азура ишзаламго ацәаҳәа "Ԥсоу" аремонт азухаанӡа.
Убри аамҭазы арҭ ацәаҳәақәа рремонт аҟаҵара иазоужьын 84 миллион мааҭ.