АҞӘА, цәыббра 22 - Sputnik. Ашьаус хацыркуп Гәылрыԥшь араион инхо Гарик Харчылаа иганахь ала, абри атәы аанацҳауеит Аԥсны ААР апресс-маҵзура.
Харчылаа абџьар закәаншьаҭада аахәареи, аҭиреи, аныҟәгареи, иара убасгьы закәаншьаҭада анаркотикқәа раахәареи, рыҵәахреи, рымҩангареи хараны идырҵоит.
Аԥсны ААР аусзуҩцәа иааныркылаз иҩны анеимырдоз иаадырԥшит: згәыцә 7,62 милллиметра иҟоу Симонов икарабин, згәыцә 5,45 миллиметреи 7,62 миллиметреи иҟоу Калашников иавтоматқәа ҩба, згәыцә 5,45 миллиметра иҟоу 30 патрона.
Аекспертцәа ражәақәа рыла абџьар ахысразы ԥынгыла амамкәа еиқәшәоуп.
Харчылаа иҩны, иара убасгьы, иаарԥшын анаркотикатә маҭәашьар каннабис, 5 граммк.
Гәылрыԥшь араион аӡбарҭа аӡбрала Харчылаа даанкылоуп. Аусҭҵаара мҩаԥыргоит Гәылрыԥшь араион ААР аусҭҵааратә гәыԥ.