АҞӘА, цәыббра 22 - Sputnik. Москва Аԥкаанҵа анапы аҵаҩуп Урыстәылантәи Аԥсныҟа баџьда иаларгало анефҭаалыҵқәа рхышәаҵышәа азырҳаразы ҳәа аанацҳауеит "Аԥсныпресс".
Аԥкаанҵа инақәыршәаны Урыстәыла аенергетика аминистрреи Урыстәыла аекономикатә ҿиара аминистрреи Аԥсны Аҳәынҭқарра аекономика аминистрреи 2021 шықәсазтәи аквота ҿыцқәа шьақәдыргылеит.
Цәыббра 21 рзы апресс-конференциаҿ Аслан Бжьаниа иҳәеит ареспублик аиҳабыра шрылаӡаз абылтәы ахышәаҵышәа еиҳаны Аԥсныҟа аагаразы, аҩныҵҟатә џьырмыкьаҿы ахәқәа еиҭа ихамларц. Ахәқәа рызҳара амзызқәа ируакны иҳәеит ареспубликаҿ абылтәы еиҳа еиҳаны ахархәара.
Аԥсны нанҳәеи цәыббреи амзақәа рзы абылтәы аҟамзаара иахҟьаны ауадаҩрақәа ыҟан.