АҞӘА, цәыббра 28 - Sputnik. "Аҟәатәи АТП" акредитортә уал ф-миллионк еиҳауп ҳәа ҳәан Аԥсны аԥыза-министр Александр Анқәаб иԥылараҟны.
Аиԥылара иалахәын: "Аҟәатәи АТП" адиректор Леонид Шәлымба, адиректор ихаҭыԥуаҩ Галина Шларԥҳа, анаплакы аҳасабеилыргаҩ хада Инга Қапԥҳа.
Анаплакы ауал еиҿкаахеит еиуеиԥшым афондқәа, аиҿкаарақәа, атранспорт азы ахәҭақәа аазго анаплакқәа рҿаԥхьа ашәахтә хыԥхьаӡалара ала.
Аиԥылараҿ илацәажәеит анаплакы аныҟәгараз иҟоу ауадаҩрақәа ртәы, атәылауаа ауаажәларратә транспорт рҭахрақәа ирықәшәо аҟаҵаразы аиҿкааратә зҵаарақәа.
Аиԥылара алкаақәа рыла Александр Анқәаб Аекономика аминистрреи Аҟәа ақалақь ахадареи рнапы ианиҵеит анаплакы аҭагылазаашьа ҭырҵаарц, иҟоу ауадаҩрақәа рылҵразы ахырхарҭақәа рыԥшаарц.