АҞӘА, цәыббра 30 - Sputnik. Аԥсни Аахыҵ Уаԥстәылеи рхадацәа Аслан Бжьаниеи Анатоли Бибилови Аҟәа Ахьӡ-аԥша Апарк аҿы ашәҭшьыҵәрақәа шьҭарҵеит.
Аслан Бжьаниеи Анатоли Бибилови Ахьӡ-аԥша Апарк аҟны ашәҭшьыҵәрақәа шьҭарҵеит
© Sputnik / Томас Тхайцук
Аԥсны жәлар Рџьынџьтәылатә еибашьраан иҭахз ргәалашәара аҿаԥхьа ихырхәеит Аԥсны аԥыза-министр Александр Анқәаб, апарламент аиҳабы Валери Кәарҷиа, Аԥсны иҟоу Аахыҵ Уаԥстәыла ацҳаражәҳәаҩ Олег Боциев, Аԥсны иҟоу Урыстәыла ацҳаражәҳәаҩ Алексеи Двинианин, аҳәынҭқарратә усбарҭақәеи аминистррақәеи рнапхгаҩцәа.
Аахыҵ Уаԥстәыла аиҳабыра рхаҭарнакцәа рделегациа, атәыла ахада Анатоли Бибилов раԥхьа днаргыланы, Аԥсныҟа иааит цәыббра 27 рзы Аиааиреи Ахьыԥшымреи Рымш аҳаҭыразы имҩаԥгахо ауснагӡатәқәа рылахәхаразы.
Аԥшьаша цәыббра 30 рзы Аԥсны ахада Иусбарҭаҿы имҩаԥысит Аԥсни Аахыҵ Уаԥстәылеи рхадацәа ргәырӷьаратә еиԥылара. Анаҩс имҩаԥысит Бжьаниеи Бибилови инеиҵыху реилатәара, Аԥсны аҳәынҭқарратә усбарҭақәа рнапхгаҩцәеи Аахыҵ Уаԥстәылатәи аделегациеи алархәны.