АҞӘА, цәыббра 30 - Sputnik, Бадраҟ Аҩӡба. Аиааиреи Ахьыԥшымреи Рымш 28 шықәса ахыҵра аҳаҭыр азы Аҟәа Ахьӡ-аԥша амемориал аҿаԥхьа агәырӷьаратә арратә мҩасра мҩаԥыргеит аԥшьаша цәыббра 30 рзы.
Арратә оркестр ианарҳәоз амузыка ршьаҿа ақәыршәаны имҩасит 500-ҩык аруаа - Аԥсны Атәылахьчара аминистрра, Аҟәатәи иреиҳаӡоу азеиԥшдҵаҟаҵаратә ҵараиурҭа, урыстәылатәи абыжьбатәи арратә база, Аԥсны иҟоу Урыстәыла Афедералтә шәарҭадаратә маҵзура аҳәаахьчаратә усбарҭа иртәу аруаа.
Ари агәырӷьаратә мшы азгәаҭаразы Аԥсны аҳҭнықалақь аҿы еизеит аибашьра аветеранцәа, Аԥсны анҭыҵтәиқәагьы убрахь иналаҵаны. Урҭ рыбжьара дыҟоуп хатәгәаԥхарала Адыгеиатәи Ареспубликаҟынтә иааны еибашьуаз Шамсудин Гунажоков.
"Аибашьраан досу ишилшоз еиԥш Аԥсны дацхраауан, аҿар аӡәырҩы зыхнымҳәит аибашьра адәаҟынтәи. Зыԥсы ҭаны иаанхаз зегьы ақәра ду нырҵааит, ари аџьанаҭ дгьыл рыхьчалааит", - иҳәеит аветеран.
Цәыббра 30 1993 шықәса рзы Аԥсны Арбџьармчқәа Егры аӡиас иаԥну Қырҭтәылеи ҳареи иҳабжьоу аҳәынҭқарратә ҳәаахь инеины ҳҳәынҭқарратә бираҟ ахадыргылеит, уи алагьы 413 мши ҵхи ицоз аџьынџьтәылатә еибашьра хыркәшан.
Уинахыс Аԥсны Қырҭтәыла амч ахнаҳәеит, ахы иақәиҭхеит, Қырҭтәыла аиурисдикциа азхазымҵо ахатәы напхгара шьақәнаргылеит.
Сынтәа Ахақәиҭреи Ахьыԥшымреи Рымш азы Аԥсныҟа иааит Аахыҵ Уаԥстәыла ахада Анатоли Бибилов зхадараҿы дыҟоу аделегациа.
Иара убас шәаԥхьар ҟалоит:
Цәыббра 30 - Аԥсны Аиааиреи Ахьыԥшымреи рымш
Аибашьҩы Берзениа: аӡә ида ҳаанымхаргьы, ҳаԥсадгьыл ҳара ишаҳтәу инхар акәын