АҞӘА, жьҭаара 1 - Sputnik. Урыстәылатәи аскульптор Григори Потоцки Аиааира амшныҳәазы Аҟәа аҳамҭа азыҟаиҵеит. Абри атәы аҩуеит аҳҭнықьалақь ахадара.
Аскульптура ҿыц ргылоуп Аҟәа ахадара аҿаԥхьа иҟоу апарк аҟны. Аартра далахәын ақалақь ахада Беслан Ешба, аскульптура апарк ианаалеит ҳәа азгәеиҭеит иара.
Автор иажәақәа рыла, аџьаз иалхәу ашәҭбыбк (одуванчик-аред.) иану иаарту анапсыргәыҵақәа аҭынчреи ақьиареи ирсимволуп.
"Ақьиара узшьом. Аҭынчра зегьы еиԥшны иаҳҭахуп", - иҳәеит Потоцки.
Аскульптура аура 2,5 метра иҟоуп, иара аргыларазы аӡиас Кәыдры аҟынтәи ахаҳә ду ааган.
Григори Потоцки еиҭеиҳәеит, аиԥш зеиԥшу "Ашәҭбыбк" абаҟақәа 32 тәыла рҟны ишаарту: ЕАА, Филлипины, Мексика, Коста-Рика, Франциа, Испаниа, Германиа, Австриа, Санкт-Петербург.