АҞӘА, жьҭаара 2 - Sputnik, Бадраҟ Аҩӡба. Аплатформа "Гәыма" аҿы асахьаҭыхыҩ Архип Лабахәуа испектакльқәа хԥа дырбахоит жьҭаара 2 инаркны 4 рҟынӡа, абри атәы Sputnik акорреспондент изеиҭеиҳәеит асахьаҭыхыҩ.
Акультуратә усмҩаԥгатә алагоит 19:00 сааҭ рзы.
Аусмҩаԥгатә ҩ-хәҭакны еихшахоит, актәи ахәҭаҟны аспектакль ахаҭа ықәдыргылоит, аҩбатәи ахәҭаҟны - Лабахәуа еиҭеиҳәоит аԥсҭазаара аҟынтәи ахҭысқәа.
"Аспектакльқәа рыхԥагьы еиԥшӡам. Аиԥылара аҩбатәи ахәҭаҟны еиҭасҳәоит автобиографиатә хҭысқәа", - ҳәа азгәеиҭеит иара.
Аспектакльқәа рхаҭақәагьы иавтобиографиатәуп, " ари ахәыҷқәа ирызкӡам, афилософиатә жәамаанқәоуп" иҳәеит автор.
Иара убасгьы, асахьаҭыхыҩ иазгәеиҭеит ари аҩыза " азанааҭ" шышьҭикааз шықәсқәак раԥхьа, уи алагь маҷк аԥара ширҳаз Европатәи агалереиақәа рыҟны англыз бызшәала дықәгыло.
Уаанӡа Лабахәуа итеатркьанџьа аспектакльқәа дирбахьан ихатәы ҟазарҭаҿы.
"Гәыма" иара убасгьы, агәҭакы анагӡаразы иманшәалоуп иҳәеит асахьаҭыхыҩ.