АҞӘА, жьҭаара 2- Sputnik. Аԥсны Жәлар Реизара адепутат Алмасхан Арӡынба аҩнуҵҟатәи аусқәа рминистрра ахыбра аԥхьа ажәҩанахь дхысит, ахҭыс ҟалеит асааҭ 00:10 рзы, жьҭаара 1 ауха. Абри атәы аанацҳауеит Аԥсны ААР апресс-маҵзура.
Арӡынба иусутә машьына "Hyundai" ала Академик Марр ихьӡ зху амҩаду ала иҟоу Аԥсны ААР аушьҭырҭа-гәаҭаратә пункт ахь дадгылеит.
Аԥсны ААР апресс-маҵзура ишаҩуа ала, Арӡынба имашьына дҭыҵны "иумҭа ашәарҭара шаҵыз дырны, аҵакыра ауаажәларратә ҭыԥны ишыҟоу хьаас имкыкәа, ацәгьоура хықәкыс иманы, ауаажәларратә ҭынчра еилеиганы" Калашников автомат ала жәажәантә ажәҩанахь дхысит.
Ахҭыс ашьҭахь Арӡынба аҭыԥ аҟнытәи иҽиӡеит, дахьцаз еилкааӡам.