АҞӘА, жьҭаара 3 - Sputnik, Бадри Есиава. Аԥсны ахада Аслан Бжьаниа Москва иусутә визит аанкыланы Аԥсныҟа дхынҳәит Аҟәа аԥшаҳәаҿы цәыббра 30 рзы аветеранцәеи, адепутати, амилициауааи рыбжьара иҟалаз аимак аҵыхәала. Абри атәы аанацҳауеит ахада ипресс-маҵзура.
Бжьаниа Аԥсныҟа дхынҳәит жьҭаара 3 рзы шьыбжьон. Иара уажәы амчратә усбарҭақәеи, ахада Иусбарҭа анапхгареи, аиҳабыра рхаҭарнакцәеи алархәны иарку аилацәажәара мҩаԥигоит.
Аԥсны ахада Москваҟа дцеит жьҭаара 1 рзы. Ипресс-маҵзураҿы ишазгәарҭахьаз ала, иара Урыстәыла ахада иусбарҭеи Урыстәылатәи Афедерациа аиҳабыреи рыҟны аиԥыларақәа иоур акәын.