АҞӘА, жьҭаара 4 - Sputnik. Аԥсны Аҩнуҵҟатәи аусқәа рминистрра ахыбра аҿаԥхьа иарбанызаалак хысра ыҟамызт, абри аҩыза аҳәамҭа ҟаиҵеит Жәлар Реизара адепутат Алмасхан Арӡынба Апарламент аҿы имҩаԥысуаз аилацәажәараҿы.
"ААР ахыбра аганахь ала хысрак ыҟамызт", - иҳәеит Арӡынба.
Иара иазгәеиҭеит цәыббра 30 – жьҭаара 1 ауха аҭыԥ змаз ахҭыс ауааԥсыра асоциалтә ҳақәеи Аԥсны ААР апресс-маҵзура адырралеи ирдыруеит ҳәа.
"Иҟаз жәдыруеит. Акыр иԥшӡамызт. Рацәак ахҳәаагьы асымҭеит. Сгәы иаанагоит аус аҽа хырхарҭак арҭар рҭахушәа", - иҳәеит адепутат.
Цәыббра 30 ауха Апарламент адепутат Алмасхан Арӡынба Аԥсны ААР ахыбрахь днеины закәаншьаҭада имаз автомат "Калашников" ала ахысра далагеит, анаҩс аҭыԥ аҟынтәи дыбналеит.