АҞӘА, жьҭаара 5 - Sputnik, Наала Гәымԥҳа. Д.И. Гәлиа ихьӡ зху Аԥсуаҭҵааратә институт аҟны имҩаԥысит аҭоурыхтә ҭҵаарадыррақәа ркандидат ҳәа ахьӡ аиуразы Инал Џьапуа идиссертациа ахьчара. Уи темас иамоуп "Аԥсны архитектуратә баҟақәа актәи азқьышықәса ҳера иаҵанакуа (аҭҵаареи иҟоу аматериалқәа реидкылареи)".
"Ари аусумҭа нап асыркит 2015 шықәсазы, Аԥсны Аҭҵаарадыррақәа ракадемиа санаспирантха инаркны. Аусумҭа хыркәшан 2019 шықәсазы. Уи ҵакыс иамоу Аԥсны архитектуратә баҟақәа актәи азқьышықәса ҳера иаҵанакуа аҭҵаареи аматериалқәа иҟоу реидкылареи, насгьы урҭ абаҟақәа рыхьчаразы аҳәынҭқарра аҿаԥхьа иқәгылоу азҵаарақәеи, еиуеиԥшым аамҭақәа рзы ишьақәгылаз аорганқәа рыҭҵаара азҵаарақәа разааҭгылара ауп", - ҳәа иҳәоит иара.
Аусумҭа ахьчара иалахәын аҭоурыхҭҵааҩцәа, археологцәа, Аԥснытәи аҳәынҭқарратә университет апрофессорцәа, адоцентцәа, аспирантцәа. Аилатәара аартуа, аҭоурыхтә ҭҵаарадыррақәа рдоктор, академик Олег Бӷажәба иазгәеиҭеит ари аусумҭа иара напхгаҩыс дшамаз, насгьы иааидкыланы далацәажәеит аҭҵаамҭаҟны ицәыргоу атема, адиссертант уи аарԥшра ахьынӡаилшаз атәы.
Ари аилатәара иҵегьы рхы аладырхәраны иҟан аҳәаанырцәынтәи аҵарауаа, аха Аԥсны ишьақәгылаз аепидемиатә ҭагылазаашьа иахҟьаны урҭ раара залымшахеит, аха дара реиҳараҩык онлаин-ҳасабла аилатәара иалахәын, ргәаанагарақәа рҳәартә аҭагылазаашьа рыман.
Инал Џьопуа ихаҭа иқәгылараҟны инарҭбааны иусумҭа дахцәажәеит, ҿагылара изызуаз аоппонентцәа рызҵаарақәа рҭак ҟаиҵеит.
Инал Џьопуа Аԥсуаҭҵааратә институт аҟны акандидаттә диссертациа ахьчараан
© Sputnik / Наала Гумба
Иахьа ахьчарахь ицәыргаз аҭҵаарадырратә усумҭа иамҽханакит еиуеиԥшым аамҭақәа рзы Аԥсны иҟаз ажәытә архитектуратә баҟақәа рыҭҵаара, урҭ шәышықәсас изҵазкуа, иахьа уажәраанӡа еиқәырханы иаагоу абаҟақәа реиҷаҳареи ииашаны урҭ рызнеишьеи рыпроблематә зҵаарақәа.
Инал Џьопуа Аԥсуаҭҵааратә институт аҟны акандидаттә диссертациа ахьчараан
© Sputnik / Наала Гумба
Аԥсуаҭҵааратә институт аҿы еиҿкаау Адиссертациатә хеилак алахәылацәа жәохәҩык Инал Џьопуа иҭҵаарадырратә усумҭа ахә бзианы иршьеит, дара еицҿакрыла рыбжьы рҭиит аҭоурыхтә ҭҵаарадыррақәа ркандидат ҳәа ахьӡ даԥсахарц.