АҞӘА, жьҭаара 7 - Sputnik. Европа агаз ахә ахалара еиуеиԥшым амзызқәа ирыхҟьеит, амчхаралшарақәа рхархәара ҳаракгьы абрахь иналаҵаны аҳауатә ԥсахрақәеи, иҭәым агазеизакырҭақәеи уҳәа, иҳәеит Урыстәыла ахада ипресс-маӡаныҟәгаҩ Дмитри Песков. Абри атәы аанацҳауеит РИА Новости.
Акризис зыхҟьаз еиуеиԥшым амзызқәа аамҭак еицақәшәеит ҳәа ишьоит иара.
"Арахь иаҵанакуеит аекономика аиҭашьақәгылара, ус анакәха амчхаралшарақәа еиҳа рхархәара, адгьыл иҵоу агазеизакырҭақәа ахьҭәым, уи адагьы Европа аҳауатә ҽыԥсахрақәа, аԥшарҿиара ахьмаҷу", - иҳәеит Песков.
Иара иажәақәа рыла иҟоуп егьырҭ амзызқәагьы аамҭак ала абарҭ ирыцлаз.
"Агаз еиҳа имаҷны аџьармыкьахь инеиуеит. Аха уи Урыстәыла акәым изхароу, ззанааҭ иазҟазам , иҟоу ззеилымкаауа ауаа ус аҳәара рылшоит", - иҳәеит иара.
Иара убасгьы иациҵеит аенергетикатә зҵаарақәа рҿы акомплекстә знеишьа шаҭаху.
Владимир Путин уаанӡа иҳәахьан изызхәыцым аӡбрақәа рыхҟьаԥҟьақәа Европа аенергоџьармыкьа ишаныԥшыз.
Уи ашьҭахь Еврокомиссиа ахада Урсула фон дер Лиаеен аҳәамҭа ҟалҵеит ЕЕ азы акыршаҵанакуа аенергетикахь аинвистициақәа рынашьҭра.