АҞӘА, жьҭаара 13 - Sputnik. Имазеиу хәышықәсатәи аҳәаанырцәтә тәылауаҩшәҟәқәа рырҭалоит жьҭаара 13 инаркны асааҭ 11:00 - 18:00 рзы Урыстәылатәи Афедерациа Ацҳаражәҳәарҭа Гагратәи аконсултә пункт аҿы, абри атәы аанацҳауеит Ацҳаражәҳәарҭа Facebook аҿы.
Аконсултә пункт аус ауеит Гагра араионтә милициа аҟәша аҩбатәи аихагылаҿы. Атәылауаҩшәҟә ҿыц аиуразы уаанӡа иркыз адокумент рымазароуп.
Гагратәи аконсултә пункт еиҿкаан Урыстәылеи Аԥсни рыдәныҟатәи аусқәа рминистрцәа 2009 шықәса жьҭаарамзазы Аҟәа Сергеи Лавров данааз амшқәа раан ҿырҳәала ирыбжьарҵаз аиқәшаҳаҭра инақәыршәаны.
Ари апункт аадыртит 2010 шықәсазы, уи аахижьҭеи иара аус ауеит акурорттә сезон иалагӡаны, аӡынреи ааԥынреи иаркуп.