АҞӘА, жьҭаара 19 - Sputnik. Аҟәатәи амедицинатә коллеџьи, Гагратәи амедицинатә ҵараиурҭеи ООН Ахәыҷтәы фонд (ЮНИСЕФ) Аҟәатәи аофис аҟынтәи ахархәагақәеи алабҿабатә рбагақәеи рырҭеит, аанацҳауеит Аԥсны агәабзиарахьчара аминистрра.
Аколлеџьи аҵараиурҭеи ирыҭоуп анатомиатә модельқәа, афантомқәа/аманекенқәа, амедицинатә мыругақәа, ахалаҭқәа, аплакатқәеи апостерқәеи, иааидкыланы 1,5 миллион мааҭ рыхә ҳәа аҳәоит адырраҭараҿы.
Аҟәатәи амедицинатә коллеџьи Гагратәи амедицинатә ҵараиурҭеи аҳамҭақәа роуит
© Foto / Минздрав Абхазии
Агәабзиарахьчара аминистр Едуард Быҭәба Ахәыҷтәы фонд (ЮНИСЕФ) ахаҭарнакцәа ҭабуп ҳәа реиҳәеит.
"Агәабзиарахьчара аминистрра аҳәарала амедицинатә ҵараиурҭақәа ирҭоу астудентцәа ирҭахны иҟоу ахархәагақәа аанахәеит. Уи ҳара ҳзы акраҵанакуеит", - иҳәеит аминистр.
Аҟәатәи амедколлеџь аҿы аҵара рҵоит 378 студент, Гагратәи амедҵараиурҭаҿы – 100-ҩык.