АҞӘА, жьҭаара 24- Sputnik, Асмаҭ Ҵәыџьԥҳа. Фазиль Искандер ихьӡ зху аурыс драматә театр, жьҭаара 23 рзы жәларбжьаратәи афестиваль "Соотечественники" иалауреатхеит. Абри атәы Sputnik акорреспондент илзеиҭеиҳәеит, атеатр адиректор Иракли Хьынҭәба.
Афестиваль иалахәын Урыстәыла, Казахстан, Белоруссиа, Ермантәыла, Аԥсны. Афестиваль аҳәаақәа ирҭагӡаны РУСДРАМ иқәнаргылеит аспектакль "Кьоџьаа рҭыӡшәа"
"Аспектакль ашьҭахь, еицырдыруа атеатр акритикцәа злахәыз ахцәажәара мҩаԥысит. Уаҟа арежиссиор иуси ҳартистцәа рҟазареи ахәшьара ҳаракы аҭан. Аиашаз, афестивальқәа рыҟны шамахамзар имаҷуп аекспертцәа реилазаара зегь еицҿакны ахәшьара бзиа анарҭо. Ари ахәаԥшцәагьы ҳаргьы ҳзыҳәан ныҳәак иаҳзаҩызахеит", - иҳәеит Хьынҭәба.
Агастрольқәа рҳәаа иҭагӡаны РУСДРАМ аҭаараны иҟоуп Тамбов, Иарославль, Иваново, Твер. Артистцәа Аԥсныҟа ихынҳәуеит абҵара 2 рзы.