АҞӘА, жьҭаара 23- Sputnik. Иҳаҩсыз ҩымш рыла акоронавирус зцәа иалаз хәҩык апациентцәа ԥсит Аԥсны амедусҳәарҭақәа рҿы, аанацҳауеит ауааԥсыра акоронавирус рацәыхьчаразы аоперативтә штаб.
Гәдоуҭатәи ахәшәтәырҭаҿы рыԥсҭазаара иалҵит 80-еи, 73-еи, 74 шықәса зхыҵуаз хҩык аҳәса, 71 шықәса зхыҵуаз хаҵаки. Аҟәа иҟоу амобилтә госпиталь аҿы иԥсҭазаара далҵит 1941 шықәса рзы ииз ахаҵа.
Абыржәтәи аамҭазы Гәдоуҭатәи араионтә хәшәтәырҭа хадаҿы ишьҭоуп 94-ҩык, рҭагылазаашьа бааԥсуп 24-ҩык, ибжьаратәуп - 48-ҩык. Аҟәатәи аинфекциатә хәшәтәырҭаҿы ирхәшәтәуеит акоронавирус зцәа иалоу 41-ы, урҭ рахьтә 12-ҩык ачымазҩцәа рҭагылазаашьа уадаҩуп. Очамчыра ирхәшәтәуеит 22-ҩык, Гагратәи ахәшәтәырҭаҿы - 27-ҩык, урҭ рахьтә фҩык рҭагылазаашьа уадаҩуп. Тҟәарчалтәи ахәшәтәырҭаҿы 15-ҩык ачымазаҩцәа шьҭоуп. Аҟәа иҟоу амобилтә госпиталь аҿы - 90-ҩык ишьҭоу рҟынтәи 12-ҩык рҭагылазаашьа хьанҭоуп.
Аԥсны аҿкчымазара зцәа иаланы иаадырԥшыз ауаа рхыԥхьаӡара 30924 -ҩык рҟынӡа инаӡеит, ргәы бзиахахьеит 26313 -ҩык ауааԥсыра, рыԥсҭазаара иалҵит 447-ҩык.