АҞӘА, жьҭаара 28 - Sputnik. Аԥсны ахада Аслан Бжьаниеи Урыстәыла аиҳабыра рхада ихаҭыԥуаҩ Александр Новаки реиԥылараҿы "амҩатә хсаала" анагаӡареи, атәыла фымцамчла аиқәыршәара арманшәалареи, газла аиқәыршәара асхема хадеи ирылацәажәеит.
Бжьаниа Новак диԥылеит усутә ныҟәарыла Моска иҟазаара аҳәаақәа ирҭагӡаны. Аиԥылараҿы аганқәа ирылацәажәеит аԥсуа-аурыс еизыҟазаашьақәа
Аиԥылара иалахәын Аԥсны ахада Иусбарҭа анапхгаҩы ихаҭыԥуаҩ и.н. Валери Папба, аԥыза-министр ихаҭыԥуаҩ, аекономика аминистр Кристина Озган.
Аԥсны ахада Аслан Бжьаниеи Урыстәыла ахада Иусбарҭа анапхгаҩы ихаҭыԥуаҩ Дмитри Козаки, Урыстәыла Ашәарҭадаратә хеилак амаӡаныҟәгаҩ ихаҭыԥуаҩ Рашид Нургалиевы реиԥылара мҩаԥысхьеит.
Аԥсны ахада Москваҟа амҩа дықәлеит жьҭаара 25 рзы. Жьҭаарамза иалагӡаны Аслан Бжьаниа ҩынтәны усутә ныҟәарыла Москваҟа дцеит. Атәыла ахадас дыҟоуижьҭеи Москваҟа аусутә зҵаарақәа рыӡбаразы зынӡа жәантә дцахьеит.