АҞӘА, абҵара 1 - Sputnik. Аԥсны апрокуратура хада ахҳәаа анаҭеит Аԥсны жәлар Рџьынџьтәылатә еибашьра аветеранцәа рхеилак еидгыла Аӡҩыбжьа ақыҭан имҩаԥыргаз аиԥылараҟны ирыдыркылаз аҳәамҭа.
Аветеранцәа ргәы иҭоуп абҵарамза 4 рзы, Аҟәа Аԥсуа драматә театр ашҭаҿы, аҩнуҵҟатәи аусқәа рминистр Дмитри Дбар иамхразы аҿагыларатә акциа амҩаԥгара, дара цәыббра 30 рзы аԥшаҳәаҟны иҟаз ахысразы апрокуратура хада имҩаԥнаго аусҭҵаара алҵшәақәа ирықәшаҳаҭым.
"Аԥсны ахада идырны аамҭа ахигоит, азакәаншьаҭа змоу аӡбамҭа идыикылом. Ишахәҭоу аус ахаҵгылареи, иҟаз шыҟаз афактқәа рыҵәахреи ашьҭахь Аԥсны апрокуратура имҩаԥнагаз аусҭҵаара агәра ҳазгом, Атәыла анапхгара ииашаны закәанла азҵаара аӡбара рҭахәуп ҳәа иаҳбом", - ҳәа аҳәоит АИХ-қәа рҟны икьыԥхьу аветеранцәа рхеилак иҟанаҵаз аҳәамҭа.
Апрокураура хада ирҳәеит, имҩаԥыргаз аусԥшаарақәа рылҵшәақәа рыла Аԥсны ААР ихаҭыԥуаа рганахьала ишхацырку ашьауӷатә усқәа.
"Аусбарҭа иҟанаҵаз алкаақәа аагоуп цәыббра 30 ауыха, 2021 шықәсазы Аҟәа аԥшаҳәаҿы иҟаз аимак иалахәыз ражәақәа рыла, урҭ рхыԥхьаӡараҿы иҟоуп Очамчыра араион Аӡҩыбжьа ақыҭа анхацәа, Аԥсны жәлар Рџьынџьтәылатә еибашьра аветеранцәа. Аус иалахәу зегьы рҿахәы рҿыхраан гәынамӡарак аадмырԥшит, иара убас еиҭырҳәаз ахарҭәааразы аусбарҭа иадымҵаалеит", - аҳәоит апрокуратура аҳәамҭаҟны.
Аусԥшаарақәа мҩаԥган ашьаусмҩаԥгаратә закәанеидкыла инақәыршәаны, рҳәеит аусбарҭаҟны.
"Аӡәык-ҩыџьак ргәазыҳәара анагӡаразы иҟаҵоу аҳәамҭа аҳаҭырларҟәра ауп иаанаго, ари Аԥсны апрокуратура хада имҩаԥнаго ашьаусԥгаара аԥырхагахара ауп ҳәа иршьоит. Ас еиԥш иҟоу аҳәамҭақәа рыҟаҵара иаԥсам", - рҳәеит Апрокуратура хадаҿы.
Цәыббра 30 ауха Апарламент адепутат Гарри Кокаиеи, Аӡҩыбжьа ақыҭантәи аибашьра аветеранцәеи, Аҩнуҵҟатәи аусқәа рминистр Дмитри Дбари инапаҵаҟа иҟаз ауааи рыбжьара аҭыӡшәа ҟалеит, адепутат ажәҩанахь данхыс ашьҭахь.