Хәнызқьҩык рҟынӡа аҭааит Гагра иаартыз Урыстәыла ахазынарақәа роптикатә цәыргақәҵа, ҳәа Sputnik иазеиҭалҳәеит аиҿкааҩ Анна Савилова.
"Нанҳәеи цәыббреи амзақәа рзы мышкы ала 100-200-ҩык ацәыргақәҵа иаҭаауан. Жьҭаарамзазы еиҳа еиҵахеит. Ацәыргақәҵа раԥхьаӡа акәны Аԥсны иахьымҩаԥысуаз, насгьы уи апандемиа аамҭа иахьақәшәаз ала акыр ақәҿиара аманы имҩаԥысит ҳәа сгәы иаанагоит", - лҳәеит лара.
© Sputnik / Томас Тхайцук
Савилова лажәақәа рыла, аиҳараҩык аҭааҩцәа туристцәан. Аҭыԥантәиқәа рацәаҩымызт. Аха уи аӡыргаратә аилахәыра амҩаԥгашьа иахҭнылҟьоит аиҿкааҩ.
Ацәыргақәҵа еиҿнакааит Аинформациатә технологиақәеи, амеханикеи, аоптикеи руниверситет Санкт-Петербургтәи амузеи. Арахь иааган Карл Фаберже ирҿиамҭақәа роптикатә ахкьыԥхьаақәа: "Пасхальное яйцо "Ландыши", "Пасхальное яйцо "Ренессанс", "Часы-петушок", "Лавровое дерево", "Пасхальное яйцо "Орден Святого Георгия", иара убасгьы Николаи II иҭаацәаратә коллекциа.
Аметодика авторс дыҟоуп Иури Денисиук. 1960-тәи ашықәсқәа рзы иара ихәыцит ахаҭа еиԥшу асахьа апластина алашарашәахәала аголограмма анҵара.
© Sputnik / Томас Тхайцук
Савилова илҳәеит амузеи аусзуҩцәа акультуратә проект амҩаԥысшьа агәахәара рнаҭеит, ҽааны еиҳа инарҭбааны имҩаԥыргараны ишыҟоу.
"Усҟан аҽак аагоит. Аоптика аганахь ала аус зыдуылақәо рацәоуп. Иӡырыргаша рымоуп", - ҳәа лҳәоит Савилова.
Ацәыргақәҵа мҩаԥган ажәытәтәи гагратәи аӡынтә театр ахыбраҿ. Ԥхьаҟазы иазыԥхьагәаҭоу апроект аҽа ҭыԥк аҟны имҩаԥгахоит.
Аӡынтәи атеатр ргылан 1950-шықәсазы анемец тҟәацәа рнапала. Аԥсны жәлар Рџьынџьтәылатә еибашьра аахыс иахьанӡагьы аус ауам.
© Sputnik / Томас Тхайцук