АҞӘА, абҵара 8 - Sputnik. Аслан Бжьаниа Тҟәарчал араион ахь аинвистициақәа радыԥхьаларазы иҟоу аԥеиԥшқәа дырзааҭгылеит.
Иара иҳәеит ишыҟоу аинвесторцәа – Тҟәарчал арацәа ацхра аинтерес змоу.
"Аилацәажәарақәа мҩаԥаагоит, сгәы иаанагоит мызқәак аҭаххоит ҳәа ари аус нап алаҳкуоу иалаҳамкуоу аилыргаразы", - иҳәеит Бжьаниа арацәа аҵхра азҵаара дазааҭгыло.
Ахада далацәажәеит араионаҿы Аинвестпрограмма амҩаԥгарагьы.
"2023-2025 шықәсқәа рызтәи Аинвестпрограмма еиҳа еиҳаны араион аргыларақәа алаагалоит, аӡхыҽҽахьы уназго амҩахәҭа еиҭашьақәҳаргылоит. Апрограмма иалаҵахоит Кәын Иашҭахь ухазгало амҩа апроект. Аригьы араион аҿиара иацхраашт. Тҟәарчал араион ҳхамшҭӡеит, аха зегь маншәаланы, имарианы ишымҩаԥымсуа шәхаҭагьы ижәбоит", - иҳәеит иара.
Бжьаниа иазгәеиҭеит сынтәа араион абиуџьет 218 миллион мааҭ шартәаз, уи аҟынтә алагалатә хәҭа 21 миллион роуп иҟоу, егьи 196 миллион мааҭ аҳәынҭбиуџьет иатәуп.
"Ҳара шықәсык аҩнуҵҟа 10 миллиард мааҭ ҳҭахуп еиуеиԥшым азҵаарақәа – аӡеиқәыршәара, амҩақәа рыҟаҵара уҳәа рыӡбаразы. урҭ аԥарақәа аинвесторцәа рҟынтә мацароуп иҳауыр ахьалшо", - ҳәа иҳәеит Бжьаниа.
Ҿырԥштәысгьы иааигеит сынтәа инагӡаз атуристтә проект "Тамшь Village". Ара аус руеит 180-ҩык, бжьаратәла 35 000 мааҭ роуеит.