АҞӘА, абҵара 8- Sputnik. Иҳаҩсыз ҩымш рыла акоронавирус зцәа иалаз быжьҩык апациентцәа ԥсит Аԥсны амедусҳәарҭақәа рҿы, аанацҳауеит ауааԥсыра акоронавирус рацәыхьчаразы аоперативтә штаб.
Гәдоуҭатәи ахәшәтәырҭаҿы рыԥсҭазаара иалҵит 62-еи, 63-еи, 65-еи, 86-еи, 85-еи шықәсқәа зхыҵуаз хәҩык аҳәса, иара убас 72 шықәса зхыҵуаз ахаҵеи. Аҟәатәи аинфекциатә хәшәтәырҭаҿы лыԥсҭазаара далҵит 84 шықәса зхыҵуаз аԥҳәыс.
Абыржәтәи аамҭазы Гәдоуҭатәи араионтә хәшәтәырҭа хадаҿы ишьҭоуп 72-ҩык, рҭагылазаашьа бааԥсуп 28-ҩык, ибжьаратәуп - 28-ҩык. Аҟәатәи аинфекциатә хәшәтәырҭаҿы ирхәышәтәуеит акоронавирус зцәа иалоу 42-ы, урҭ рахьтә 12-ҩык рҭагылазаашьа уадаҩуп. Очамчыра ирхәшәтәуеит 22-а, Гагратәи ахәшәтәырҭаҿы - 29-ҩык, урҭ рахьтә хҩык рҭагылазаашьа уадаҩуп. Тҟәарчалтәи ахәшәтәырҭаҿы жәаҩык ачымазцәа шьҭоуп. Аҟәа иҟоу амобилтә госпиталь аҿы - 114-ҩык, 12-ҩык рҭагылазаашьа хьанҭоуп.
Аԥсны ачымазараҿкы зцәа иаланы иаадырԥшыз ауаа рзеиԥш хыԥхьаӡара 32609-ҩык рҟынӡа инаӡеит, ргәы бзиахеит 27688 -ҩык ауааԥсыра, рыԥсҭазаара иалҵит 476-ҩык.