АҞӘА, абҵара 8 - Sputnik. Урыстәылатәи аруаа ЕАА аӷбақәа Амшын еиқәахь рҭалара иашьклаԥшуеит, дара рҟынтәи иарбанызаалак провокациак алдыршом, ҳәа аҳәамҭа ҟаиҵеит Урыстәыла Атәылахьчара аминистр Сергеи Шоигу ателеканал "Россия 1" адырраҭара "Москва. Кремль. Путин" аҟны.
ЕАА АММеи НАТОи рымчрақәа арегион аҿы аоперациа аицымҩаԥгара азыԥхьагәарҭоит. Убри азы Амшын еиқәа аӡеизакырахь иҭалеит америкатәи аесминец "Портери" Афбатәи афлот афлагман "Маунт Уитни".
"Амшын еиқәахь арегион иаҵанамкуа аҳәынҭқарра аӷба анҭало, уи зхысра акыр анаӡара амоу абџьар анақәгылоу еилумкаарц залшом атуристтә ныҟәара шакәым арахь изааз. Уагьашьклаԥшуеит ҳәарада. Ибанзар иудыруеит апровокациақәагьы аҭыԥ роур шауа", - ҳәа иҳәеит Шоигу.
Иара иажәақәа рыла ЕАА ари аҭагылазаашьала еилнакаар аҭахуп "заҟа ҳахиоу, атәыла аладатәи акалҭ заҟа ихьчоу".
"Ишыздыруа ала ақырҭуа флоти аукраин флоти алархәны аҽазыҟаҵарақәа мҩаԥысраны иҟоуп. Ус анакәха ҳаргьы аҽазыҟаҵарақәа мҩаԥаагоит", - ҳәа иҳәеит аминистр.
Рашәарамзазы британиатәи аесминец Defender Амшын еиқәаҿы аҳәынҭқарратә ҳәаа еиланагеит. Иара усҟан афлоти авиациеи атерриториатә ӡқәа ирҭырцеит.